Jon Hernandez Hidalgok aurrekontuak itzultzea eskatu du, “aberastasuna birbanatzeari eta Euskadi eraldatzeari uko egiten dion proiektu kontserbadorea delako”
Eusko Legebiltzarreko Osoko Bilkuran, Sumar koalizioak defendatu du 2026ko Aurrekontuen proiektuari aurkeztutako osoko zuzenketa, uste baitu “proiektu kontserbadore eta kontinuista” dela, eta uko egiten diola aberastasuna birbanatzeari eta Euskadin beharrezkoak diren eraldaketa sakonei. Sumarreko legebiltzarkide Jon Hernandezek salatu duenez, EAJren eta PSEren Gobernuaren kontuek “ez dute ordezkatzen benetako herrialdea, hilabete amaierara iristeko borrokan ari den herritarrena”.
Hernandezek adierazi du Gobernuak “850 milioi euro bideratzen dituela segurtasunera eta 482 milioi etxebizitzara”, eta horrek erakusten duela “polizian etxebizitzan baino bi aldiz gehiago inbertitzen den eredua”. Bere esanetan, aurrekontuek “ez dute etxebizitza publiko nahikorik sortuko, ez dute espekulazioa geldiaraziko eta ez dituzte gazteak eta familia langileak babestuko”, Jaurlaritzak “higiezinen eta finantzen interes boteretsuei aurre egiteari uko egiten dielako”.
Legebiltzarkideak ohartarazi du aurrekontuek “ez dituztela konpontzen bizi-segurtasunik eza, itxaropenen blokeoa eta pobrezia kronifikatzen ari den egoera”. Azaldu duenez, Gobernuak “oraina administratzeko egindako kontuak aurkezten ditu, ez etorkizuna prestatzeko”, eta horrek esan nahi du “aberastasunaren benetako birbanaketari, zerbitzu publiko sendoei eta herritarrei botere gehiago emango dien demokrazia ekonomikoari uko egitea”.
Hernandezek kritikatu du aurrekontua “gero desagertuko den aparteko zor batean” oinarritzen dela, eta ez dagoela “eraldaketa-proiektu sendo” bat. Nabarmendu du Euskadik “gaitasun osoa duela trantsizio energetikoan, demokrazia ekonomikoan eta berrikuntza publikoan Europako abangoardian kokatzeko”, baina Jaurlaritza “dagoena mantentzera mugatzen” dela.
Arlo fiskalean, Sumar koalizioak salatu du “langile klaseak sostengatzen dituela kontu hauek”, kapitalaren errentek eta ondare handiek “ekarpen eskasa” egiten duten bitartean. Hernandezek gogorarazi du erreforma fiskalak “200 milioi euro baino gehiago kenduko dizkiela zerbitzu publikoei”, ez baliabide faltagatik, baizik eta “Gobernuak uko egiten diolako gehien dutenei gehiago eskatzeari”.
Osasun eta hezkuntza arloan, Hernandezek adierazi du Gobernuak “arrakalak betetzen dituela egiturazko arazoei heldu gabe”. Azpimarratu du “itunpeko pribatuak blindatuta jarraitzen duela eta sare publikoak kargak bere gain hartzen dituela”, eredu “dual eta segregatzailea” mantenduz.
Politika industrialari eta trantsizio ekologikoari dagokienez, Sumarrek kritikatu du Jaurlaritzak “itzulkin sozialik gabeko diru publikoa mugitzen” duela. Hernandezek adierazi du 2027ra arteko finantzaketa bereziak “ez duela bermatzen ez enplegu egonkorra, ez benetako deskarbonizazioa, ezta etekinetan parte-hartze publikoa ere”.
Azkenik, Hernandezek salatu du “akordiorako borondate falta osoa” dagoela. Azaldu duenez, Jaurlaritzak “ez du inolako adostasunik bilatu nahi izan” eta gehiengo absolutuan oinarritu da. “Zilegi da, baina ezin da esku luzatuaz hitz egin dilisten politika bat eskaintzen den bitartean: nahi badituzu, jan; eta bestela, utzi”, adierazi du.
