Ezker Anitza-IUk mozio bat eramango du Donostiako Udaleko osoko bilkurara, Eusko Jaurlaritzaren agindua noiz argitaratzen den kontuan hartu gabe GLLak behar dituztenei ez eteteko
Arantza Gonzalez Ezker Anitza-IUko zinegotziak, Elkarrekin Donostia udal taldearen barruan, bere mozioarekin premia larria duten familia zaurgarrien oinarrizko beharrei erantzutea nahi du.
2025ko maiatzaren 26a. Arantza Gonzalez Ezker Anitza-IUko Elkarrekin Donostia udal taldeko zinegotziak iragarri du mozio bat eramango duela Udaleko osoko bilkurara, Udal Gobernuari eskatzeko urte bakoitzaren hasieran ez etetea Gizarte Larrialdietarako Laguntzen (GLL) ordainketa premiazko beharra egiaztatuta duten herritarrei.
Ezkerreko alderdiko zinegotziak adierazi duenez, azken batzordean Gizarte Zerbitzuetako arduradunak jakinarazi zuen Larrialdietarako Laguntzak, alokairua eta hipoteka ordaintzeko direnak izan ezik, bertan behera geratzen direla urtarrilean eta ez direla berriz hasiko Eusko Jaurlaritzak haien gehieneko zenbatekoak EHAAn argitaratu arte.
“Aurten agindua maiatzaren 16an argitaratu da, eta, beraz, premia larria duten pertsonen ia erdiek ez dituzte jaso laguntza horiek ia urte erdian, nahiz eta Udalak berak eta Eusko Jaurlaritzak askoz lehenago onartu zituzten 2025erako aurrekontuak” esan du Arantza Gonzalezek.
Gonzalezen ustez, “ez da onargarria kalteberatasun-egoera oso larriak arintzeko helburua duen prestazio ekonomiko bat aldi baterako etetea, arrazoi formalengatik. Argindarra edo gasa ordaindu ezin duten familientzat ez da inolako laguntza Udalak beranduago ordaintzea atzeraeraginezko izaerarekin, atzerapen honek haien egoera larriagotu eta argia bezalako oinarrizko horniduren mozketa ondoriozta dezakeelako”.
Ezker Anitza-IUko zinegotziak adierazi du laguntzen aldi baterako etete hori arazo larria dela onuradunentzat, hainbat arrazoirengatik ahultasun maila handia duten familientzat. Hala, Gonzálezek jakinarazi duenez, 2023ko Gizarte Ekintzako Memorian agertzen denez, Donostiako Udalak 3,5 milioi euro bideratu zituen GLLak ordaintzera, eskatu behar izan zituzten 2.853 familiaren oinarrizko premiak betetzeko. Guztira 4.816 onuradun izan ziren, eta horietatik % 68,63 emakumeak izan ziren, gehienak 65 urte edo gehiagokoak. Hiriaren ekialdeko barrutian hartzaile guztien % 43,84 daude.
Datu horien arabera, “ezin dugu alde batera utzi GLLen ordainketa eteteak duen genero eragina, % 69 emakumeak eta adinekoak baitira. Tokiko gobernuaren aldetik horrelako ekintzek pobreziaren feminizazioa sakontzen laguntzen dute”, azpimarratu du Arantza Gonzalezek.
Horregatik guztiagatik, Ezker Anitza-IUko zinegotziak udal gobernuari eskatuko dio ez ditzala bertan behera utzi GLLen kontzesioa premiazko beharra behar bezala egiaztatuta duten herritarrei.
