Eder Garciak Sopela Integraren edizio berria aurkeztuko du urriaren 20an, hurbileko enplegua sustatzen duen ekimena
Sopelako Udaleko Toki Garapeneko Arloak, Eder Garcia Sopelako Udaleko bozeramailea eta Ezker Anitza-IU buru dituela, Sopela Integra programari jarraipena emango dio 2026/2027 ikasturtean. Ekimen horrek hurbileko enplegua sustatzen du, eta udalerrian erroldatutako pertsonak lan merkatuan sartzeko aukerak hobetzera bideratuta dago, prestakuntza ekintzen eta taldeko laguntzaren bidez.
Aurreko edizioan, 49 pertsonak hartu zuten parte programaren fase batzuetan, eta 15 pertsonak laneratzeko prozesuetan, Lanbideren prestakuntza ofizialean eta enplegu edo ekintzailetza programa zehatzetan amaitu zuten. Ibilbide bakoitzean 15 eta 20 pertsona artean hartu zuten parte, eta talde bakoitzeko bost pertsonak lan-merkatuan sartzea lortu zuten.
Eduki berriak, talde-ikuspegia eta eten digitalari arreta
Edizio berriak eduki gehiago ditu, eta profil bakoitzaren beharretara egokitutako prestakuntza praktikoaren aldeko apustuari eusten dio. Edizio berriaren aurkezpena urriaren 20an izango da Kurtzio Kultur Etxean, goizeko 9: 00etatik 14:00etara. Sopelako eta inguruko enpresa-sareko bost erakunde adierazgarrik hartuko dute parte, bai eta aurreko edizioko parte-hartzaileek ere.
Jardunaldian zehar parte hartuko duten enpresak, gehien eskatzen diren profil profesionalak eta hautagaitzak helarazteko bide desberdinak ezagutaraziko dira.
Programak bi ibilbide bereizi izango ditu. Alde batetik, Integra Empleo, batez ere iraupen luzeko langabeei, lan-merkatuan sartzeko zailtasun handienak dituzten pertsonei, hizkuntza- edo digitalizazio-zailtasunak dituzten pertsona migratuei eta beren gaitasun pertsonal zein lanekoak sendotu behar dituztenei zuzendua. Urritik maiatzera garatuko da, hilabetean behingo hiru orduko zortzi lantegirekin. Saio bakoitzak prestakuntza-edukiak eta pilulak ekintza praktikoekin zein elkarlanarekin uztartuko ditu.
Beste alde batetik, Smart Job langabezian geratu berri direnei, lana hobetzeko prozesuan daudenei, beren birkokatzea azkartu behar duten profesionalei eta tresna digitalen oinarrizko erabilera duten pertsonei zuzenduta dago. Ibilbide honek bi ekintza intentsibo izango ditu: bata udazkenean (2026ko urrian) eta bestea udaberrian (2027ko martxoan), lantegi bakoitzeko 15 orduko prestakuntzarekin.
DToki Garapen Arlotik, eta 2025. urtean egindako Enpresen Diagnostiko eta Plan Estrategikoaren ildotik, “Sopela ekintzailetzaren eta enpresa-hazkundearen ekosistema dinamiko bihurtzea tokiko talentua aprobetxatuz” jarri da ardatz. Hazten ari den, jaiotza-tasa altua duen eta biztanleria gaztea duen udalerri batean talentuari eustea Toki Garapen Arloaren oinarrizko helburua da.
Eder García Toki Garapeneko zinegotziaren hitzetan: “Toki Garapen Arloak ateak zabalik ditu lana bilatzen, lan-hobekuntzan edo ekintzailetzan ari diren pertsona guztientzat, eta arreta integrala eskaintzeko lan egiten da, gizarte-kohesioa eta udalerrian sustraiak izatea, eten digitala eta pertsona guztiak kabitzeko ibilbide pertsonalizatuak erraztea kontuan hartuko dituena”.
