Jon Hernandez Hidalgok azalpenak eskatu ditu karga polizialengatik eta indarkeriagatik Bilbon Palestinaren alde egindako protesta baketsuan

Sumar kolaizioak galdera sorta bat erregistratu du Eusko Legebiltzarrean, joan den abenduaren 13an Bilboko Plaza Biribilean Palestinaren alde egindako protesta baketsuan Ertzaintzak izan zuen jarduna argitzeko. Izan ere, kontraesan nabarmenak daude Segurtasun Sailak zabaldutako bertsio ofizialaren eta Gazarako Mugimendu Globala Euskal Herria kolektiboaren kontakizunaren artean; azken horrek poliziaren kargak eta indarkeria-egoerak salatu ditu esku-hartzean.

Jon Hernández Sumarreko legebiltzarkideak adierazi duenez, «beharrezkoa da argitzea bertsio ofizialaren eta mobilizazioa deitu zuten pertsonen kontakizunaren artean kontraesan argia duten gertakariak». Ildo horretan, azaldu du erregistratutako galderen helburua dela jakitea «zer gertakari zehatz, objektibo eta egiaztagarrik eragin zuten esku hartzeko agindua», bai eta «une horretan pertsonen edo ondasunen osotasun fisikorako berehalako zer arrisku zegoen» ere.

Plaza Biribilean egindako hasierako ekitaldiaren ondoren, hainbat dozena lagunek desobedientzia zibileko ekintza sinboliko bat egin zuten, tranbiaren bideetan eserita. CAFek kudeatzen duen azpiegitura da, eta ekintza horren bidez Palestinako herriarekiko elkartasuna adierazi eta enpresak Israelgo Estatuarekin lotutako proiektuetan duen inplikazioa salatu nahi izan zuten. Une horretan, deialdia egin zuten pertsonen arabera, identifikazio hertsatzaileak, karga polizialak eta atxiloketak izan ziren, eta gutxienez pertsona bat atxilotu eta egun horretan bertan aske utzi zuten.

Hori guztia dela eta, Sumarrek Eusko Jaurlaritzako Segurtasun Sailari zuzendu dizkio galdera horiek, poliziaren esku-hartze horri buruzko azalpenak eskatzeko. Deitzaileen esanetan, esku-hartze horrek kargak eta atxiloketak barne hartu zituen protesta baketsu baten testuinguruan. Koalizioak eskatu du argitzea «zein protokolo aktibatu zen», «jarduketaren maila zehazteko zein adierazle objektibo erabili ziren» eta «karga polizialak egiteko berariazko agindua nork eman zuen».

Era berean, Sumar koalizioak galdetu du «manifestariei zer jokabide zehatz egozten zaizkien» Ertzaintzako agenteen aurkako erasoak izan zirela dioen baieztapen ofiziala justifikatzeko, eta «zenbat polizia-atestatutan jasotzen diren ustezko eraso horiek».

Gainera, koalizioak argibideak eskatu ditu «zenbat agentek behar izan zuten osasun-arreta», «zein osasun-zentrotan artatu zituzten» eta «zein lesio-txosten dauden» argitzeko, eta zalantzan jarri du «lau agente zauritu» izan zirela publikoki zabaltzeko arrazoia. Halaber, galdetu du «zein arrazoi zehatzek justifikatu zuten atxiloketa» eta zergatik utzi zuten pertsona atxilotua egun horretan bertan aske.

Imagen de portada de Ecuador Etxea.