UdalBerrik 5 proposamen aurkeztu ditu ekaineko udalbatzan

LGBT Harrotasunaren Nazioarteko Eguna ospatzen den hilean, Bilboko lesbiana, gay, bisexual, transgenero, queer eta intersexualen kolektiboaren errealitateen diagnostikoa eskatuko du UdalBerrik.  Diagnostiko hori, inplikatutako gizarte zibilaren parte-hartzearekin eta adostasunarekin egitea ezinbestekoa ikusten dute, kolektiboaren premiak Bilbon zeintzuk diren identifikatu ahal izateko, betiere hainbat eremutatik begiratuta, hala nola hezkuntzaren, lanaren edo gizartearen eremuetatik, besteak beste.

“LGTBQI+ pertsonen ahotsa entzunarazi behar dugu, sexu- eta genero-aniztasuna defendatu behar dugu eta, aldi berean, homofobia eta  transfobia salatu behar ditugu. Gure erantzukizuna da diskriminazio mota guztiei aurre egitea eta benetan librea eta berdintasunezkoa izango den hiri bat lortzen saiatzea”, adierazi du Carmen Muñoz bozeramaileak.

Bestalde, Trenbidearen Hego Sahiesbidearen afektazioa gure udalerrian eta Abiadura Handiko Trenarekiko konektagarritasunari buruzko proposamen bat aurkeztuko dute.

Eusko Jaurlaritzako eta Gobernu zentralaren arteko akordiaren arabera, Trenbidearen Hego Saihesbidearen, obrak, bi fasetan egingo dira. UdalBerritik uste dute, akordio horrek ez duela salgaien trafikoaren egungo arazoa konpontzen, are gehiago, larriagotu egiten duela. Azpiegitura horren lehenengo fasea martxan jartzen denean, salgai-konboiak Olabeaga auzotik hurbil igaroko dira eta, udalerriaren hegoaldea Cantalojaseko tuneletik zeharkatu ondoren, La Peña eta Abusu auzoetan barrena aire zabaletik igarotzen jarraituko dute ADIFen C3 linea erabiliz.

Arazo hau konpontzeko uste dute Abiadura Handiko Trenaren Basauri-Bilbo tunela konektatzea posible dela, salgaien trenen trafikoa ahalbidetzeko, eta Basaurik ADIFen C3 lineara konektatzeko.

 

Hiri berdeago bat lortzeko asmoarekin Bilboko baratze ekologikoen ekimenak arautzeko udal-ordenantza baten garapena eskatuko du udal-taldeak. Uste dute koherentzia handiagoa eman behar zaiola 2015ean abian jarri zen proiektuari, bere jatorrizko filosofia herrikoia babestuz. Muñezen ustez “Hau horrela izan dadin, baratze irisgarriak, etxeetatik hurbilekoak eta hirian benetan txertatuak egon beharko lirateke. Horrezgain, elikadura-subiranotasuna sustatuz autokontsumorako baliagarri izatea premiazkoa da koaliziarentzat. Gure ustez honelako toki-ekimenek benetako inpaktu globala dute, eta klima-aldaketaren aurkako borrokaren adierazgarri dira”.

 

Laugarren proposamenean Diru-sarrerak Bermatzeko Errentaren kudeaketaren hobekuntza eskatuko du UdalBerrik premian dagoen pertsona edo familia bat ere kanpo ez uzteko.

Horrezgain Eusko Jaurlaritzako Enplegu Sailburuak, Beatriz Artolazabalek, DBE-ren inguruan egindako baieztapenen ezeztatzea bilatzen dute. Hitzez hitz, honako hau esan zuen «650 euro kopuru nahikoa da pertsona batek bizitza duin bat eduki dezan». Hau entzunda, gogoratu behar zaio sailburuari 2016. urtean, erosketa-saskiak 220 euroko kostua zuela, batez beste, eta etxebizitza bat alokatzeko batez besteko prezioa, berriz, 871 eurokoa zela. “Gauzak horrela, argi dago 650 euro ez dela nahikoa oinarrizko premiak beteta bizitzeko. Egoera honetan haserregarria da Gobernuko arduradun batek erakutsi duen kontu falta. Honekin argi gelditzen da euskal oasitik hain urrun dagoen errealitate soziala ez dutela ezagutzen” esan du Amaia Arenal zinegotziak.

Azkenik, patologia neurologikoak dituzten haurrentzako uretako terapiako ikastaroak egitea eskatuko dute.

Horrelako gaixotasunak dituzten haurren familiak terapia hauek eskatzen dituzten arren, gaur egun ez dute arreta egokia jasotzen, kasu askotan eritasun minoritarioak direlako. “Esan beharra dago esku-hartze terapeutikoek onura ugari eragiten dituztela bai maila fisikoan, bai maila psikikoan eta, horregatik, medikuek, errehabilitatzaileek, neuropediatrek eta fisioterapeutek gomendatu egiten dituztela. Uretako esku-hartzea haur bakoitzaren gaitasunetara egokitzen da, eta haurren konfiantza indartzen da eta komunikazioa ahalbidetzen da, uretatik kanpo egiten diren tratamendu konbentzionalekin baino askoz ere modu eraginkorragoan”, adierazi du Arenalek.